بڕگەکانی دانیشتن
-
یەکەم: خوێندنەوەی یەکەمی پێشنیاری یاسای بیست و دووەمین هەموارکردنی یاسای میلاک ژمارە (25)ی ساڵی 1960. (لیژنەی یاسایی). (2 ماددە).جێبەجێکراو
-
دووەم: خوێندنەوەی یەکەمی پێشنیاری یاسای سێیەمین هەموارکردنی یاسای یەکێتیی یاسازانان ژمارە (137)ی ساڵی 1981. (لیژنەی یاسایی). (28 ماددە).جێبەجێکراو
-
سێیەم: خوێندنەوەی یەکەمی پێشنیاری یاسای دووەمین هەموارکردنی یاسای سەندیکای کیمیازانان ژمارە (43)ی ساڵی 1970. (لیژنەی کار و ڕێکخراوەکانی کۆمەڵگەی مەدەنی و ئەنجومەنی خزمەتگوزاری فیدراڵی و لاوان و وەرزش). (18 ماددە).جێبەجێکراو
-
چوارەم: خوێندنەوەی یەکەمی پڕۆژە یاسای یەکەمین هەموارکردنی یاسای دیوانی وەقفی سوننە ژمارە (56)ی ساڵی 2012. (لیژنەی هەرێمەکان و پارێزگا نەگرێدراوەکان بە هەرێمەوە و پلاندانان و بەرنامەی حکومەت و ئەوقاف و ڕۆشنبیری و گەشتیاری). (7 ماددە)جێبەجێکراو
-
پێنجەم: گفتوگۆی گشتی.جێبەجێکراو
کۆنووسی دانیشتن
ئەنجومەنی نوێنەران لە بەرواری (19/7/2026) سێیەمین دانیشتنی وەرزی یاسادانانی دووەمی ساڵی یاسادانانی یەکەمی خولی هەڵبژاردنی شەشەمی بەست بە سەرۆکایەتی بەڕێز هیبەت حەلبووسی سەرۆکی ئەنجومەن و بە ئامادەبوونی (182)، و دانیشتنەکە ئەمانەی لەخۆگرت:
- دەنگدان لەسەر هەڵوەشاندنەوەی دامەزراندنی بەڕێز موحیی مورتەزا قەزوینی سەرۆکی ئەنجومەنی خزمەتگوزاری فیدراڵی و دوو جێگرەکەی، و ڕاسپاردەی حکومەتی کرد بە سپاردنی بەڕێوەبردنی ئەنجومەنەکە بە بەتەمەنترین ئەندام.
- خوێندنەوەی یەکەمی پێشنیاری یاسای بیست و دووەمین هەموارکردنی یاسای میلاک ژمارە (25)ی ساڵی 1960 کە لەلایەن دوو لیژنەی دارایی و یاساییەوە پێشکەشکراوە.
- خوێندنەوەی یەکەمی پێشنیاری یاسای سێیەمین هەموارکردنی یاسای یەکێتیی یاسازانان ژمارە (137)ی ساڵی 1981 کە لەلایەن لیژنەی یاساییەوە پێشکەشکراوە.
- خوێندنەوەی ڕاپۆرتی وەزارەتی بەرگری تایبەت بە بەدواداچوونی وردەکارییەکانی ڕووداوی تەقەکردن لە ماسیگرە عێراقییەکان لەلایەن پاسەوانی کەنارییەکانی کوەیتەوە کە بووە هۆی کوژرانی ماسیگری عێراقی نەجم عەبدوڵڵا خالید تەمیمی و برینداربوونی یەکێکی دیکە، سەرباری دەستگیرکردنی ژمارەیەک ماسیگری عێراقی، و ڕاگەیاندنی هاوخەمی ئەنجومەنی نوێنەران لەگەڵ داواکارییەکانی ماسیگرە عێراقییەکان و پاراستنی مافەکانیان. لیژنە پەرلەمانییەکە ڕاسپاردەی کرد بە هەژمارکردنی ماسیگر نەجم عەبدوڵڵا بە شەهید بەپێی یاسای شەهیدان و بریندارانی وەزارەتی بەرگری بەرکار، و وەزارەتەکە تێچووی چارەسەرکردنی ماسیگرە عێراقییە بریندارەکە بگرێتە ئەستۆ و قەرەبووی ماسیگرەکانی دیکە بکاتەوە کە لە ڕووداوەکەدا زیانیان پێگەیشتووە، سەرباری لابردنی فەریقی دەریایی ڕوکن مازن عەبدولواحید فەرماندەی هێزی دەریایی و لیوای دەریایی ڕوکن وائیل عەبدولموحسین بەڕێوەبەری ئۆپەراسیۆنە دەریاییەکان و لیوای دەریایی ڕوکن لەیس عەبدولسەتتار فەرماندەی بنکەی دەریایی ئوم قەسر، و هەمان وەزارەت جێگرەوەیان بۆ دابنێت، و ڕاسپاردەی کرد بە ئاراستەکردنی نووسراوی سوپاسگوزاری بۆ لیوا حیکمەت حەلیم زایع فەرماندەی ناوچەی چوارەمی فەرماندەیی هێزەکانی پاسەوانی سنوور لە وەزارەتی ناوخۆ و لیوای هەواڵگری زولفەقار زەکی کازم بەڕێوەبەری هەواڵگری لە وەزارەتی بەرگری، سەرباری پێکهێنانی لیژنەیەک لە ئەنجومەنی نوێنەران و لایەنە پەیوەندیدارەکان بۆ بەدواداچوونی ئازادکردنی ماسیگرە عێراقییە دەستگیرکراوەکان و حوکمدراوەکان لە وڵاتی کوەیت لە ڕووداوەکانی پێشوودا
- بەڕێز هیبەت حەلبووسی سەرۆکی ئەنجومەن سوپاسی خۆی پێشکەش بە شاندە پەرلەمانییەکە کرد کە سەردانی پارێزگای بەسرەی کرد و لە وردەکارییەکانی ڕووداوەکە وردبووەوە.
- دەنگدان لەسەر پەسەندکردنی ڕاسپاردەکانی لیژنەی ئاسایش و بەرگری دەربارەی تەقەکردن لە ماسیگرە عێراقییەکان.
بەشێک لە دانیشتنەکە بە سەرۆکایەتی بەڕێز عەدنان فەیحان جێگری یەکەمی سەرۆکی ئەنجومەن بەڕێوەچوو
- خوێندنەوەی یەکەمی پێشنیاری یاسای دووەمین هەموارکردنی یاسای سەندیکای کیمیازانان ژمارە (43)ی ساڵی 1970 کە لەلایەن دوو لیژنەی کار و ڕێکخراوەکانی کۆمەڵگەی مەدەنی و ئەنجومەنی خزمەتگوزاری فیدراڵی و لاوان و وەرزش، و یاساییەوە پێشکەشکراوە.
- خوێندنەوەی یەکەمی پڕۆژە یاسای یەکەمین هەموارکردنی یاسای دیوانی وەقفی سوننە ژمارە (56)ی ساڵی 2012 کە لەلایەن لیژنەی هەرێمەکان و پارێزگا نەگرێدراوەکان بە هەرێمەوە و پلاندانان و بەرنامەی حکومەت و ئەوقاف و ڕۆشنبیری و گەشتیارییەوە پێشکەشکراوە.
- مداخەلەکانی خاتوو و بەڕێزان پەرلەمانتاران لە گفتوگۆ گشتییەکاندا چڕبوونەوە لەسەر داواکردنی بەدواداچوونی بارودۆخی کارەبا لە ژمارەیەک پارێزگا و پێویستی باشترکردنی دابینکردنی کارەبا بۆ هاوڵاتیان لە ڕێگەی پلان و چارەسەری واقیعی، سەرباری پێویستی دۆزینەوەی چارەسەری ڕاستەقینە بۆ قەیرانی ئاو و تێکەڵبوونی ئاوی ئاوەڕۆ لەگەڵ ئاوی خواردنەوە کە دەبێتە هۆی پیسبوون و هەڕەشە لە ژینگە دەکات، لەگەڵ داواکردنی دانەوەی شایستە دواکەوتووەکانی جووتیاران.
- ئەندامانی ئەنجومەنی نوێنەران لە دانیشتنەکەدا جەختیانکردەوە لەسەر بانگهێشتکردنی بەرپرسانی پەیوەندیدار لە وەزارەتی پەروەردە بۆ وردبوونەوە لەو پێوەرانەی وەزارەتەکە لە دانانی پرسیارە تاقیکردنەوەکانی قۆناغە کۆتاییەکاندا پەیڕەویان دەکات.
بەشێک لە دانیشتنەکە بە سەرۆکایەتی بەڕێز فەرهاد ئەتروشی جێگری سەرۆک بەڕێوەچوو
- ئەندامانی ئەنجومەن داوای دامەزراندنی دەرچووە کۆنەکان و پلە یەکەکانیان کرد بە پشتبەستن بە یاسا بۆ مسۆگەرکردنی مافەکانیان، سەرباری دامەزراندنی دەرچووانی پیشە پزیشکی و تەندروستییەکان، و داواکردنی جێگیرکردنی فەرمانبەرانی گرێبەست بە هەموو ناونیشانە وەزیفییەکانیانەوە.
- جێگری سەرۆکی ئەنجومەن ئاراستەیکرد بە میوانداریکردنی بەڕێز پارێزگاری بەغدا و سەرۆکی ئەنجومەنی پارێزگا و لایەنە پەیوەندیدارەکان لە لیژنەی هەرێمەکان و پارێزگا نەگرێدراوەکان بە هەرێمەوە، بۆ زانینی ئەو پێوەرانەی لە گۆڕینی سەرۆکەکانی یەکە کارگێڕییەکان و دەستە سەر بەوانەدا پەیڕەو دەکرێن.
پاشان بڕیاردرا دانیشتنەکە بۆ ڕۆژی سێشەممەی داهاتوو هەڵبگیرێت.